उर्लाबारी । कोशी प्रदेश सरकारकी भौतिक पूर्वाधार विकास राज्यमन्त्री शोभा चेम्जोङ पालुङ्वाले आफ्नो जिम्मेवारीबाट विदा लिनुभएको छ ।
नेपाली कांग्रेसको तर्फबाट कोशी प्रदेश सरकारमा राज्यमन्त्रीको जिम्मेवारी सम्हाल्नुभएकी पालुङ्वाले कांग्रेस सरकारबाट बाहिरिएसँगै राज्यमन्त्री पदबाट विदा लिनुभएको हो । उहाँले २०८२ साल पौष २३ गतेदेखि २०८३ साल साउन २७ गतेसम्म भौतिक पूर्वाधार विकास राज्यमन्त्रीका रूपमा जिम्मेवारी निर्वाह गर्नुभयो । छोटो समयको जिम्मेवारी भए पनि उहाँले आफ्नो कार्यकाललाई पदमा रहने अवधिका रूपमा होइन, जनतासँग जोडिएर काम गर्ने अवसरका रूपमा उपयोग गर्नुभएको चर्चा छ ।
नेपाली कांग्रेसकी नेतृ तथा कोशी प्रदेशसभा सदस्य पालुङ्वाको राजनीतिक यात्रा स्थानीय जनताको भावना, विकासका आवश्यकता र संगठनप्रतिको प्रतिबद्धतासँग जोडिएको देखिन्छ । राज्यमन्त्रीको जिम्मेवारीमा रहँदा उहाँले आफ्नो निर्वाचन क्षेत्रसहित कोशी प्रदेशका विभिन्न स्थानका भौतिक पूर्वाधारका विषयलाई प्राथमिकताका साथ उठाउँदै आउनुभयो । विशेषगरी मोरङ क्षेत्र नं. १ मा सडक, पुल, खानेपानी, यातायात तथा अन्य भौतिक पूर्वाधारका क्षेत्रमा बजेट र योजनालाई प्राथमिकतामा ल्याउन उहाँले भूमिका निर्वाह गर्नुभएको छ । प्रदेश सरकारमा आफ्नो पहुँचलाई व्यक्तिगत लाभका लागि भन्दा जनताको आवश्यकता पूरा गर्ने माध्यम बनाउनुपर्ने मान्यतासहित उहाँ अघि बढ्नुभएको उहाँका समर्थकहरू बताउँछन् । राजनीतिमा पद प्राप्त गर्नु ठूलो कुरा भए पनि पदमा रहँदा जनताको मन जित्नु अझ ठूलो उपलब्धि मानिन्छ । पालुङ्वाको राज्यमन्त्री कार्यकाललाई पनि यही दृष्टिकोणबाट हेर्न थालिएको छ । उहाँसँग भेटघाट गर्ने, आफ्ना समस्या राख्ने र विकासका माग सुनाउने सर्वसाधारणले सहज रूपमा पहुँच पाएको अनुभव सुनाउने गरेका छन् । यही कारण उहाँको विदाइलाई एउटा राजनीतिक पदबाट हुने सामान्य बिदाइभन्दा फरक रूपमा हेरिएको छ ।
उर्लाबारी–७ निवासी पालुङ्वाले आफ्नो राजनीतिक जिम्मेवारीलाई स्थानीय तहदेखि प्रदेश तहसम्म जनताको आवाज उठाउने माध्यम बनाउँदै आउनुभएको छ । प्रदेशसभामा निर्वाचित भएपछि उहाँले आफ्नो निर्वाचन क्षेत्रका समस्या सदनमा उठाउनुका साथै सरकारका विभिन्न निकायसँग समन्वय गरेर विकासका योजना अघि बढाउन निरन्तर पहल गर्नुभयो । उहाँले नेपाली कांग्रेस कोशी प्रदेश सचेतकको जिम्मेवारीसमेत निर्वाह गरिसक्नुभएको छ । संगठनभित्रको जिम्मेवारी होस् वा सरकारमा रहेर निर्वाह गर्नुपर्ने भूमिका, पालुङ्वाले आफ्नो राजनीतिक सक्रियता निरन्तर कायम राख्नुभएको छ । कांग्रेसभित्र महिला नेतृत्वको प्रतिनिधित्व गर्दै प्रदेश राजनीतिमा आफ्नो पहिचान स्थापित गर्नुभएकी उहाँ पछिल्लो समय जिल्लादेखि प्रदेश तहसम्म सक्रिय नेतृका रूपमा परिचित हुनुहुन्छ । राज्यमन्त्रीको जिम्मेवारी सम्हाल्ने क्रममा उहाँले कर्मचारी, जनप्रतिनिधि, राजनीतिक दलका नेता–कार्यकर्ता र सर्वसाधारणसँग समन्वय गरेर अघि बढ्ने प्रयास गर्नुभयो । विकास निर्माणका काममा सरकार र जनताबीचको दूरी कम गर्नुपर्नेमा उहाँले जोड दिँदै आउनुभएको थियो । पदमा रहँदा सबैको अपेक्षा पूरा गर्न सम्भव हुँदैन । स्रोत र साधनको सीमितता, प्रदेश सरकारका आफ्नै प्राथमिकता तथा प्रशासनिक प्रक्रियाका कारण कतिपय काम तत्काल अघि बढाउन नसकिने अवस्था पनि रहन्छ । तर जनताको समस्या सुन्ने, सम्बन्धित निकायसम्म पु¥याउने र समाधानका लागि पहल गर्ने व्यवहारले जनप्रतिनिधिको मूल्यांकनमा ठूलो अर्थ राख्छ । पालुङ्वाको कार्यशैलीलाई पनि यही आधारमा सकारात्मक रूपमा मूल्यांकन गर्नेहरू धेरै छन् । कांग्रेस कोशी प्रदेश सरकारबाट बाहिरिएपछि उहाँले राज्यमन्त्रीको जिम्मेवारी छाड्नुपरे पनि जनप्रतिनिधिका रूपमा उहाँको भूमिका भने सकिएको छैन । बरु अब प्रदेशसभा सदस्यको हैसियतमा आफ्नो निर्वाचन क्षेत्र र प्रदेशका जनताका सवाल उठाउने जिम्मेवारी अझ महत्वपूर्ण बनेको छ ।
राजनीतिमा पद आउँछन् र जान्छन् । सरकार परिवर्तन हुन्छन्, जिम्मेवारी फेरिन्छन् र राजनीतिक समीकरण पनि बदलिन्छ । तर जनताको विश्वास र सम्बन्ध लामो समयसम्म रहने कुरा हो । पालुङ्वाको विदाइले यही सन्देश दिएको छ—पदमा रहँदा कमाएको विश्वास नै राजनीतिक यात्राको वास्तविक पूँजी हो । राज्यमन्त्रीबाट विदा हुँदै गर्दा पालुङ्वाले आफूलाई अवसर दिने पार्टी, सरकार, सहकर्मी, कर्मचारी, जनप्रतिनिधि तथा प्रत्यक्ष–अप्रत्यक्ष रूपमा सहयोग गर्ने सबैप्रति आभार व्यक्त गर्नुभएको छ । उहाँको कार्यकाललाई लिएर सामाजिक सञ्जाल तथा स्थानीय राजनीतिक वृत्तमा पनि सकारात्मक प्रतिक्रिया देखिएको छ । मोरङ क्षेत्र नं. १ को विकासमा अझ धेरै काम गर्नुपर्ने आवश्यकता छ । उर्लाबारी, मिक्लाजुङ, लेटाङ, केराबारीलगायत क्षेत्रका सडक, पुल, खानेपानी, कृषि, पर्यटन र पूर्वाधारका सवाल अझै पनि प्राथमिकतामा छन् । अब पालुङ्वाको भूमिका पदमा बसेर होइन, प्रदेशसभा सदस्यका रूपमा सरकारलाई जवाफदेही बनाउँदै ती योजनालाई निरन्तरता दिनेतर्फ केन्द्रित हुने अपेक्षा गरिएको छ ।